我終於完全領悟到什麼叫"低處未算處"呀!

以為到達北京就可以開始我們的旅行,

點知重頭戲現在才開始.......

 

到達北京的時候已經六點多了,

我們去了Toilet後, 便去拿行李,

未行到輸送帶已經看見Siu Yan, Keith和Diamond的行李,

但唯獨我的行李就不見,

我們也覺得很奇怪為何大家都是priority, 但就是我的那個遲遲還未出,

正當我們懷疑的否那個地勤忘了幫我的行李貼priority貼紙時,

Keith拿了一個和我同款的行李過來,

我們把它放上車仔時, 已經覺得個行李好像很奇怪似的,

第一, 它真的沒有貼priority的貼紙,

第二, 它沒有寫了我們地址的紙牌仔

第三, 它很輕, 但我的行李頗重的

第四, 那個鎖邊貼了一個不知明貼紙, 其中兩個字寫住"3 WAYS"

我嘗試用我的密碼開那個行李, 但發覺是開不到的, 已經確實它是一個"A貨",

我們立即看那個寄艙貼紙上的姓, 是寫著"Liang", 誰來的????  

我們再看看那個輸送帶, 行李應該差不多全部出來了,

其他人都已經離開, 我簡直不敢相信這些事會發生在我身上呀!

我們絕對相信姓"Liang"那個白痴, 一定是見到我那個行李第一個出來,

便開心到以為是自己的便拿走了, 明明他/她自己那個行李有一個咁特別的貼紙"3 WAYS", 都不明白為何這樣都會拿錯???

還有就是雖然我們的行李是同款, 但我那個顏色明顯是比他/她的那個深色的(好明顯這個"A貨"和我的"正貨"真的是有分別的!)

他/她是不是色盲的???  

我的心情真的跌到落谷底呀!

我們拿著那個"A貨"行李去報失, 並寫底所有資料,

希望那個白痴儘快發現那個行李不是他/她的, 便會立即回來交換,

我兩手空空的和他們一同離開機場,

什麼去旅行的心情一下子沒有了, 不停想著我的行李現在在那裡?

我有沒有可能拿回? 我這幾天的衣服怎麼辦? 我那件厚褸還在行李......九萬幾樣事情不斷湧出來,

幸好我的眼鏡跟身, 否則我之後幾日也要濛濛瀧瀧地過.....

 

好彩那天都找到一樣東西令到我的心情回復了很多的, 就是我們所住的酒店 - JW Marriott Hotel Beijing,

那間酒店非常非常正, 其一它是大酒店, 第二就是它上年十一月才開的,

所以所有東西都很新淨, 那個酒店房是繼笆提雅的Hard Rock Hotel後我最滿意的一間,

我們坐的士去到酒店, 但因為我們在後門落車, 所以我們要搭lift上一層才到receiption,

就在我們check in後, 竟然又發生一件諗都諗唔到的事, 

有一個bell boy非常快手地走來幫我們拿行李,

那麼我們當然跟著他行, 但好快我們發現他竟然行去酒店門口,

因為那時已經夜晚, 出面又沒有太多街燈, 只隱約看到對面有一座大廈, 我們以為他帶我們去另一座酒店大樓,

但我也忍不住問他"我們住在對面嗎?"

他呆一呆, 那個幫我們開門的小姐又窒一窒, 然後問"你們剛才不是check out嗎?"

呀!~~~~~~~~點呀???? 有多少機會率有人會七點多的時候check out的?????  

其實自從唔見行李後, 我就像行屍走肉的, 以為這已經是最後一單, 應該不會再發生什麼再更unexpect的事情,

但係....就係這位bell boy哥哥俾我知道原來這個世上還有一些更加無可能發生的事會發生.......

現在想起我會覺得好好笑, 但那時我真的被弄到哭笑不得, 有無搞錯呀?!

最搞笑係連他自己也忍不住笑, 真係......唉!~~~~~

我們後來討論這件事, 覺得他可能見我們搭lift出來, 以為我們由上面下來receiption,

但我也覺得既然你在這裡做, 應該知道有很多入口, 而我亦都不相信只有我們四個從後們搭lift來check in吧??

還有你這麼快衝來幫我們拿行李, 你應該見到你同事把鎖匙給我們吧?!

唉~~~~總之好難想像那天發生在我們身上的事情呀!

 

我們之後再和酒店說了不見行李的事, 叫他們幫我們不停和機場那邊check status,

幸好當晚, 我們去完王府井回到酒店再問concierge, 他們說已經找回那件行李, 機場那邊明天會送過來,

我聽完立即鬆完一口氣, 但那天晚上, 一直都睡得不好, 不停夢見個行李終於回來, 夢到這裡便會醒來,

知道原來是發夢, 又睡又醒....如是者整晚好像沒有睡過似的!

第二朝, 吃早餐時, Siu Yan和Diamond不停說一些可能性嚇我,

例如今晚當你回到房間發現那個行李原來又是貼著"3 WAYS", 那怎麼辦? (你知啦! 大陸人......check in變check out都可以了....)

又或是找到另一個和我同款而又不是我的行李.....

不是吧?! 我真的不能再受嚇了, 我真的心血少呢.......

下午我們回到酒店, 我們再check concierge,

我的行李終於回來了, 真的好想給它一個熊抱呀!

經過這一次, 以後一落機, 不理發生什麼事, 都第一時間去拿行李,

我不能再受這種打擊了!!!!

 

"A貨"

 

"正貨"

我從未試過去旅行去到咁多阻滯,

今次都可算係經典, 我希望我不會說得太亂,

這是我第一次, 亦都希望是最後一次的經驗.......

 

話說第一日(20日)出發,

本來班機十二時正起飛,

我哋(Siu Yan, Keith, Diamond & Me)在十時半開始在港龍counter排隊check in,

到差不多十一時, 條隊依然好長, 我們的位置依然在龍尾,

我們也開始擔心會否趕後及上機,

突然有一個空姐大叫問"誰是坐十二時機去北京的?",

我們立即舉手, 此時才知道整條人龍, 只有我們和一家外國人是坐這班機,

我們立即被安排去另一個counter辦理check in,

我們一埋去, 個地勤就同我哋講, 十二時的飛機已經full了,

要我們delay到兩時十五分那班機,

我們就算和他說我們訂機票時已經和航空公司預留了坐位,

但他們說沒有辦法, 因為航空公司fully book, 所以由早上八時的航機開始,

很多客人都要delay, 一路如此類推地, 我們也成為要delay的一份子,

我們當然不擺休, 堅決要他們想辦法,

但他們表示現在的情況只可以賠償每人七十五元的免費餐券和每人四百蚊現金,

其實那時都輪不到我們選擇, 因為在理論的時候, 那班機都開始入閘,

我們只有接受坐兩時四十五分那班機,

但我們要他不論用什麼辦法, 都要幫我哋轉回程那班機的時間, 由中午十二時轉去晚上九時,

還要幫我們的行李做priority, 好在最後他們都幫我們做到,

就在我們拿了那些賠償後,

國航那邊的人突然走過來說他們那邊十二時正那班機有商務客位剩,

港龍就問我哋願唔願意轉過去,

其實都是坐原先那班機, 現在還可以upgrade到商務, 又可以和原先的時間到北京,

亦廷遲了我們離開北京的時間, 又拿了那些賠償, 我們當然說有所謂,

國航的人就立即幫我們推行李過去辦理check in,

港龍就說會幫我們keep住現在的機票, 確定我們上到國航的機才會幫我們取消機位,

當我們去到國航辦完check in的手續後,

又不知什麼原因(我那時已經聽不進任何東西了, 因為太多問題了! 我想又是機位問題吧?!)

總之又話不可以上機, 簡直人都顛呀!

我們最終都是回到港龍那邊取回那些機票,

那時我們未出發便已身心疲累到想死, 我們便拿著那些餐券去飲茶, 化悲憤為食糧!

我們最後入到候機室, 以為一切都ok勒! 點知又有廣播說班機要further delay到兩點四十五分,

further delay?? 我們去睇個電視, 原來我們那班原先係一點四十分開, 但delay到兩點十五分, 現在再delay,

但我發現我們不算最可憐, 原來有一班機由十點delay到三點才起飛, 真係痴線架!

以後都係儘可能不要在紅假去旅行呢!

 (這個公仔充分表現了我們那天早上的心情)

 

勁呀! 今日是我第一次進入馬場,

多得Diamond有免費入場飛, 我先至會入馬場,

本來我預計會係好悶, 最多會睇一,兩場就會走,

但我哋去到, 剛剛是第二場比賽, 那些馬開始轉入直路階段,

我們企在草地旁看, 身後成千上萬的人,

就好像看戲時看到的情況一樣,

不停大叫自己買了的號碼,

那個氣氛好到不得了,

我沒有買都想叫埋一份....ha~~~~

 

到第三場, Diamond用了20蚊買...但輸了!

之後我們決定各自出100蚊買,

睇睇邊個到最後會贏,

之前聽過人話, 第一次賭的人多數會贏錢,

我就是恃著這樣, 便在第4場亂說一個號碼 - 7號,

然後保險地用20蚊買那隻馬,

但事實話我知, 原來第一次賭的人不是大晒的,

我和Diamond都輸了,

所以之後我們便乖乖的看著賠率來買,

竟然就在第五場, 奇蹟發生了!

Diamond那隻馬竟然贏了第一, 而我那隻亦都贏了第三,

沒有老吹, 我們有相做証, 我們足足贏了88蚊, 無錯! 係88蚊!

但這樣都已經開心死我哋了!

我們再接再厲, 但最後我都不夠Diamond好運,

他之後也贏了一次,

我買的那些馬不是一開始就扮勁不停衝, 去到直路就無氣,

就是在一開始留力, 然後去到直路都係留力咁去到終點.....

最後我都是輸60蚊離場,

不過點都好啦, 今日終於感受到馬場的氣氛,

當自己買時, 見著自己買的馬和其他馬叮噹馬頭的時候,

自己也忍不住跟其他人一樣大叫"快D"那種投入, 又真的很好玩!

我仲有幸(定不幸??)睇倒有一場, 其中一隻馬, 佢已經入咗閘,

但唔知點解發脾氣, 成個跪喺度, 連個騎師都落埋地,

有D工作人員將隻馬拉開D, 我諗係俾佢冷靜下, 但隻馬都仲發脾氣,

最後有個人就舉起紅旗示意隻馬要退出比賽!

 

我發覺喺馬場的時候, 時間很快就過,

因為完了一場, 你就要由看台迫回買飛那裡,

然後又要研究買那隻馬好, 之後又要回看台找有利位置看比賽, 忙到飛起,

但以前在舅父家看的時候, 就只覺時間過得好漫長,

不停地想知道"幾時做完?"

但我覺得最最最勁係, 我終於知道點樣劃飛了,

雖然我場場都係劃 - "位置", "第幾場", "第幾隻馬"和"20蚊"....ha~~~~~  

 

自從上個星期六update了個blog之後,

有很多朋友都問候我, 好擔心我,

所以我想在這裡和你們講,

我很好, 心情已經平伏了,

我好衷心多謝你們的關心,

我真的很感動.......

  

 

 

現在在護士口中知道她不像舅父那樣受著不必要的折磨,

上個星期因為自己傻更更"禁"完錢唔記得攞,

之後去咗銀行搞手續,

今日終於收倒銀行通知話嗰D錢已經過番落我戶口勒!

Yeah~~~~~  

琴晚, 我update完個blog之後,

突然腦裡面閃咗一個人嘅名,

佢係我中學一個朋友,

本來都唔記得Li個人,

只係近Li兩年, Terry同番班舊同學聯絡,

而嗰班舊同學又有同佢有聯絡,

所以就知道佢近Li幾年去咗英國讀書,

開頭聽都好有興趣知佢嘅近況,

因為真係無諗過到而家Li一刻都仲可以知道佢個消息,

但因為Terry所知嘅消息都只係咁多,

所以好快無咗件事,

但直到上年聖誕, 又再聽Terry再提起佢,

因為班舊同學又約佢出去聚舊, 仲話佢放假會返嚟香港

但因為Terry唔得閒, 所以都係無去,

我嗰時諗我都係無機會再知道多D關於佢嘅事,

雖然覺得可惜, 但無所謂啦!

起碼都知道佢而家喺英國讀書, 都算唔錯架勒!

而我又無再諗Li件事,

只係琴晚失驚無神又諗番佢,

咁我咪試下用班舊同學對佢嘅暱稱"XX"嚟search,

因為我覺得而家係人都有個blog架啦!

有記低聖誕嗰日佢哋聚舊嘅事都唔奇, 咁咪試下search囉!

點知search完個結果係勁多人個blog入面都有Li個暱稱嘅friend,

咁算啦! 諗住睇埋第二版嘅結果, 無就唔再搵, 點知.....

差不多去到第二版臨尾嗰時, 我見倒有一句話"仲有好耐冇見的"XX"都會出席呀, 十分期待!!!!",

咁個BLOG題目係"MERRY X'MAS", 唔會咁啱呀? 咁咪入去睇囉!

開頭因為無相, 都唔make sure係咪真係搵啱,

點知又俾我見倒嗰個blog主嘅blog友喺度留言, 寫嘅人名又係咁啱係Terry班舊同學嘅名,

我再去睇佢其他D網誌, 其中一篇佢寫咗佢轉新公司而提到佢住喺邊, 又中喎! 嗰個人真係住嗰度架喎!

咁我基本上已經98%(因為始終無相為証)相信Li度提嗰個"XX"就係我識嗰個"XX"勒!

咁我又去嗰個blog友(即係有寫底成班人名嗰個)嘅blog度睇,

我一入就入到佢講聖誕節嗰版,

嗰度好多相, 有張仲係bb仔相(原來佢哋有D結咗婚兼有埋小朋友),

就硬係搵唔倒大人相, 我拉到最後先至搵倒,

相入面每個人嘅樣都好熟悉, 但係"XX"個樣真係唔同咗呀!

如果唔係網誌寫住係佢同埋我認得其他人,

我點都唔相信Li個係佢囉!

因為佢嗰時個樣好細個, 我以為佢又係同Queenie同類(一樣係食防腐劑)架嘛!

但睇幅相, 原來佢都係一個正常人, 佢會大個架.....(Li句係讚嚟架!)

我睇倒之後, 我唔知點解, 成身起晒雞皮, 好毛骨悚然, 好驚, 成身不停喺度震,

唔得呀! 我一定要搵人講呀! 我即刻打俾Terry,

佢都好驚訝我咁都搵倒,

我同佢講我而家成身震緊呀!

佢竟然答我:"梗係啦! 夜麻麻睇埋D咁嘅野!" (我睇埋D咩呀? 大佬? ~_~")

但今朝起身再睇番佢哋個blog,

先至有真正嘅感受, 就真係發覺, 時間過得好快好快.......

原來相距最後見佢嗰時已經係12,3年前嘅事勒...........

本來今日同Diamond去完九記食牛腩河之後去ifc睇戲,

但唔知點解一個咁普通嘅星期六, 戲院竟然滿座, 全院只係淨番銀幕前嘅一,兩行,

咁我哋決定放棄睇戲, 改為當我哋諗唔倒節目嘅時候所做嘅嘢--"行街",

我哋就由中環漫無目的咁開始向灣仔方向行!

其實都唔係第一次係咁, 我哋平時都會沿住金鐘道行去灣仔, 甚至銅鑼灣,

所以今次為咗行得特別D, 我哋專登行第二條路--行上山,  

之後都唔知行咗幾耐, 我哋去到跑馬嘅半山區豪宅,

除咗周圍都係超貴價樓外, 就係身邊不停出現嘅一架架靘車.....我諗我Li一世都未必可以住倒嗰度呀!

 

數一數, 我哋今日都經過好多地方喎, 有終審法院, 政府總部, 灣仔街市, 藍屋, 半山, 跑馬地, 馬場, 南華會, 好多好靚嘅豪宅, 仲有其他外表其怪嘅大廈同埋佢哋D名......

雖然真係好攰(簡直有D攞苦嚟辛),

但諗落今日都好開心喎!

因為我去咗好多我咁大個女都未去過嘅地方,

同埋好多地方喺電視就睇得多/聽就聽得多, 但都唔知喺邊, 但今日都總算見過勒!

雖然D人成日話香港好細, 但原來行起上嚟, 都有好多地方可以去架!

我諗我下次要再發掘一D從未去過嘅香港其他地方!   

除咗一個"矇"字,

我真係唔知用乜野嚟形容自己......

 

今日放工, 就落去匯豐過數兼攞錢,

過晒數之後, 我就再check個balance數,

點解會比我預期少咗2000蚊架????

我不停諗點解, 一路諗一路"禁"錢,

搞掂晒之後, 就喺度計,

原來我過多咗2000蚊俾阿媽,

咁我就好安心D!

 

之後我就出葵芳睇醫生,

就喺去度荔景嘅時候,

我唔知點解突然諗起自己頭先"禁"完我想要幾錢之後,

好似無做攞錢嘅動作......唔係呀?!

我即刻打開銀包, 真係無嗰D錢喎!

我即刻喺度安慰自己"可能我其實係無"禁"過錢呢!"

我一落車就即刻飛奔去check個a/c.....

唔駛講, 齋睇個Title都知道個結局係咩,

我即刻打電話去銀行問,

佢話如果D錢出咗30秒無人攞,

咁佢就會自動入番去,

我記得我走嗰時, 我後面無人跟尾架!

我諗應該無事啩.......

 

不過總算不幸中之大幸,

就係我都唔算矇得晒,

因為我唔係睇完醫生先發覺,

如果唔係就真係.......好難想像呀個畫面.......

因為Terry嘅關係, 我同我一班親朋好友琴晚先有得免費睇阿旺嘅concert,

Li次係我第二次睇佢, 對上嗰次已經係2001年嘅事勒!

時間過得真係好快呀!

我仲記得上次睇, 最有印象係佢同班Dancers一字形排開一齊跳舞,

所有人嘅動作一至咁做, 個畫面真係好深刻!

同埋第一次聽佢唱"愛下去"(嘩! 勁正呀!)

所以相比嗰次, 今次佢D舞好似無跳得咁勁,

同埋今次係sale視覺效果多D,

不過都係成功嘅!

 

琴晚係公司Annual Dinner,

之前兩年喺旺角"朗豪坊",

但今年就喺紅磡"都會海逸",

我哋訂咗嗰個場係要經過食buffet嘅餐廳,

我經過嗰時見倒嗰度嘅buffet都好多野食喎!

Mandy之後同我講, 佢上次X'mas嚟食,

一個人要$480, 咁又唔係好貴喎!

因為嗰度D野食比出面多好多喎!

而我哋訂嗰個場地個景係向住維港,

同埋嗰度嘅布置都真好grand,

D嘢食都幾好食架, 好食過"朗豪坊"好多添!

 

我哋琴日嘅Dress Code係Olympic,

所以好多同事都著到好Sporty呀!

我身為committee, 事前已經俾人remind就算唔扮,

都要著番條運動褲,

搞到我之前一日, 臨急臨忙咁買咗套運動衫褲,

相比起我嘅求其,

好多同事都好落力去打扮,

有D甚至出錢出力去買衫做道具,

所以我都唔寄望會贏嗰D乜野Best Dress獎架勒!

但我點都估唔到, 公司四十幾份禮物,

連一張"馬莎"coupon都抽唔倒我,

我係咪真係咁無抽獎運呀????????     

 

抽獎時間押到食飯之後,

十點幾先開始抽,

搞到十一點先抽完,

抽唔倒禮物已經令到我乜mood都無晒,

我連嗰Best Dress獎都唔睇就走,

仲諗住咁好撞正有演唱會,

咁就可以搭倒嗰架直接返我屋企嘅車,

點知.....佢要11:30先開車,

都算勒! 我照等架車開,

其實我都知Li架車會兜路架勒!

不過點都好過我又左轉右轉咁,

但點知Li架車佢兜路嘅情況,

真係唔係一個正常人諗到架囉!

直路又唔行, 專行埋D內街,

又唔係有站, 又唔係有人上落,

簡直嘥油嘥時間,

無端端喺美孚個巴士總站自兜兩次,   

然後先上條山路去荔景.......

我落車睇下隻錶, 足足行咗一個鐘頭,

無多無少........唉.........   

琴晚, 終於成功去倒"小白屋"食飯勒!

我第一次去食係上年8,9月嘅事,

嗰次係Queenie生日,

因為嗰度D野好食同埋價錢又唔貴,

一直都想帶Diamond去食,

但之後book咗位, 又因為佢唔得閒所以去唔倒,

再唔係想去嗰日, 佢又full晒,

所以我1月就打去book定位,

本來係想2月14日去食,

但嗰日Diamond啱啱落機(由德國返嚟),

咁費事佢又專登出去,

所以就book咗琴晚,

食物依然好食, 服務依然咁好,

不枉我千里迢迢去天后食佢,

我最鍾意食嗰度D意粉,

佢整嗰D天使麵非常爽口, 唔似其他餐廳咁整到好"淋"咁!   

 

 

近日有兩個朋友好唔開心,

我都已經盡我能力去開解佢哋,

但我知道佢哋唔會因為我一, 兩句說話個心情即刻好番晒,

我知道佢哋嘅情況係好特殊,

唔係短時間就無事,

所以我好希望佢哋可以好堅強D咁去面對......

 

啊朋友們請 你聽呀聽呀聽呀 我唱歌來問候你 有什麼事情 請啊請啊請啊我 能夠來幫助你 在春天夏天 並呀並呀並呀 秋天和嚴冬 我定呀定呀定呀 令呀令呀令呀 你心呀心呀心歡喜

 

 

今日我諗係我有記憶以嚟,

喺正生日正日同屋企人食晚飯慶祝!

因為阿爸阿媽鍾意計舊曆,

咁又因為我哋食親飯都要就阿爸放假,

所以真係無試過咁樣食,

所以今年生日真係好特別.

 

今日一大早就先同Diamond去咗Ocean Park玩,

嗰度而家有好多工程呀!

雖然都仲有本身嘅機動遊戲玩,

但行嗰時, 就會覺得自己好似行街經過D地盤咁!  

所以我諗住我下次去嗰時要make sure佢D工程係完晒先呀!

 

到夜晚就同埋屋企人去咗奧海城嘅"金滿庭"食飯,

D野食都幾好味!

我諗我真係食得太多勒! 所以我而家好飽, 好飽!

 

今日, 我同Diamond搭車出TST行街,

喺巴士度, 見倒太空館門口有個好大個恐龍喎!

咁我哋就決定去太空館睇恐龍,

但去到又見倒有一套關於"黑洞"架喎!

我哋又想睇喎!

咁點算呢?

唔緊要! 佢個時間表已經幫我決定咗勒!

就係兩套都無得睇!

因為唔係時間過咗, 就係晏得濟,

所以我哋唯有睇第三個choice,

就係睇"深海"勒!

無冀望嘅野, 往往都有驚喜!

套野幾好睇喎!

唔睇唔知, 帶子原來識出聲架喎!

又原來海星係食帶子架!

當海星行近D帶子時, D帶子開頭無任何反應,

但當海星掂倒佢哋嗰時,

佢哋會即刻張開個殼尖叫一聲,

跟住個殼就會一開一合咁游咗去!

個畫面係影住同一時間幾隻帶子一齊逃走,

勁搞笑呀個場面, 我到Li一刻先知原來佢哋會咁樣游水架!

我成日覺得佢哋只會呆咗喺一個地方,

偶然會開吓個殼咁咋喎!

同埋佢介紹好多無見個嘅海洋生物,

又影倒佢哋獵食時嘅場面,

都真係幾激架喎!

但點都好! 我都會去睇嗰套"恐龍"同"黑洞"嘅!

今晚Siu Yan同Keith請咗我同Diamond去Ruby Tuesday食飯預祝我生日,

但係我同Diamond之前晏晝嗰餐食得太飽(因為晏晝Diamond家姐因為升咗職而請我哋飲茶),

所以無乜點樣食......

Anyway, 方氏夫婦!  Thank you very much!   

 

琴日Admin send咗個e-mail出嚟寫住:

邊個volunteer想做committee?? 想做就send番e-mail俾我哋.............

最大嗰個走出嚟問: 你哋邊個想做呀?

我已經不停嗌住"唔做呀!"

但最後都寫我個名俾Admin.,

"volunteer"呀! 唔識英文架?

顛架!........咁同老屈有無分別?  

有無理過我感受?

最鬼憎做埋Li D野架勒!~~~~~~ 衰爆呀! 

近排身邊嘅氣氛真係好down呀!

聽親嘅消息都唔好,

唔係身邊有朋友感情出現問題,

就係親人有絕症,

當聽得太多Li D嗰時,

就會不停咁諗起,

Li D事會唔會有一日發生喺我身邊?

 

其實前年舅父嘅事, 我個心情真係難受到頂點呀!

原來當親眼睇住一個親人離去係一件好難受嘅事,

無野可以比Li樣野更令人難受.

再之後年中, 阿媽又因為感冒搞到又暈又嘔,

我嗰一刻真係好驚架!

到年尾, 感情又好似膠住咗咁, 唔知點樣算,

曾經有諗過六年感情係咪就係咁呢?

咁當然而家舅父件事, 心情已經平伏咗好耐,

而阿媽仲好健康, 感情亦都穩定番.

但我知道如果我唔經過Li三件事,

或者我又未必會明白乜野叫做珍惜,

原來好多好多野,

以為係理所當然係有, 唔會咁易無,

成日都覺得"得架啦! 佢明架勒!"

但原來人一但無, 就無架勒!

感情都係一樣, 你以為你唔駛付出佢就會愛你一世咩?

你唔珍惜佢, 你都仲好天真咁以為佢點都會留喺你身邊咩?

根本就無可能!

開始嗰時唔去珍惜,

到知道會無嗰時, 你就算做幾多野, 都挽救唔倒,

就算挽救倒, 都已經浪費好多時間.

 

我以前雖然不至於覺得自己好慘,

但都總覺得好似差緊D咩咁,

成日都想要Li樣, 要嗰樣,

但而家我發覺, 原來只要對我最重要嘅人喺晒我身邊,

我先至係最開心, 最無缺...........

 

今日, 我陪Polun去同瑤瑤睇醫生,

因為佢隻眼生咗一粒瘡, 同埋順便去為皮膚覆診!

咁Polun帶咗佢入去醫生房,

而我就喺出面睇住細佬,

突然聽倒醫生房入面傳出瑤瑤嘅叫聲,

我哋全場人(無錯! 診所入面仲有好多病人)當場呆咗,

正喺圖書柜搵書嘅細佬立即停咗手,

望住我講,"家姐叫呀!"然後即刻走去醫生房門口跪低裝入去,

我即刻拉住佢同佢講, "無事架! 你媽媽喺入面陪住佢! 過嚟一齊睇書啦!"

其實我嗰一刻都唔覺得有咩事,

因為我以為係個醫生幫佢喺佢發炎嘅皮膚上面搽藥膏, 導致乸親D傷口, 所以佢喺度叫,

但唔夠一陣, 又傳出瑤瑤嘅喊聲, 今次比上次更厲害,

仲聽倒個姑娘不停嚇佢, "你係咪想入醫院?"

然後又話"快D按住佢隻手", "快D按住佢個頭",

聽到Li度, 我都開始擔心, 究竟入面發生緊咩事?

而細佬聽倒之後, 個樣好擔心咁講, "家姐喊呀! 我哋入去睇下呀!"

嗰一刻佢個樣真係好認真, 但又真係好得意囉!

我唯有同佢講, "家姐無事架!"

但佢個樣好明顯已經係無心機睇書,

咁我就佢同講, "我哋唔入得去架! 如果我哋入去, 醫生會同我哋打針, 好痛架!"

咁佢就點下頭, 繼續睇書.

平時只係覺得瑤瑤係會care個細佬多D,

從來唔覺得細佬會care個家姐, 可能因為佢年紀比較細,

但今日見倒細佬有D咁嘅反應,

你就知道細佬真係大個勒! 識得保護家姐勒!

 

結局係:

當瑤瑤出嚟, 我先知道原來係個醫生幫佢挑嗰粒瘡,

之後個姑娘幫佢貼紗布, 咁佢就變咗一個"獨眼龍"勒!

我見佢咁慘就撩佢講野, "你知唔知你細佬, 頭先聽倒你喺入面叫, 佢想衝入去救你呀?"

企喺隔離個細佬聽倒之後, 就即刻話"我好錫家姐架!"

喺Li個咁溫馨嘅場面, 我都有D感動呀!

但瑤瑤聽咗之後, 就用好慘嘅聲線扁住咀講, "但佢成日喺屋企打我喎!"

我嗰一刻真係唔知好嬲定好笑!

我諗細佬都啞口無言, 咁我唯有幫細佬解釋, "佢只係同你玩啫!"

唉! 我希望細佬唔好等家姐有事先嚟錫佢勒!

如果唔係, 佢做咩家姐都唔會信架勒!

 

"獨眼龍"瑤瑤                               "玩具殺手"細佬