| Jan 的个人资料Welcome To Jan Jan's Par...照片日志 |  工具  帮助 |
|
|
10月29日 心臟病發琴日本來心情好好架, 但當我接倒Diamond個電話留言之後, 我簡直由天堂跌咗落地獄..........
我聽完簡直唔相信自己隻耳仔, 我連續聽咗三次, 我再叫飛梅幫我聽多一次, 佢講返出嚟同我聽倒嘅一樣, 但我都死唔信, 再聽多一次.............
個結果都係一樣, 佢喺廣州跌咗個電話.....................
呀!~~~~~~~~~~~~我真係好想尖叫呀!~~~~~~~~~~~~~~~~
 之前一分鐘, 我仲同飛梅講我供埋11月就供完個電話.........點知..................
唉!~~~~~~~~不過.................算啦......................我知佢都唔想......................佢都好慘, 我知佢有努力過去搵架勒!
但我個心臟差D負荷唔嚟囉!
 Totally Different終於同keep咗六年長髮嘅我say good-bye勒!
 我仲諗住剪咗之後, 我會feel倒個頭會好輕, 但好似無乜大分別, 不過真係有D睇唔慣囉! 剪緊嗰一刻, Queenie仲問我想唔想喊? 但我真係好想知到個效果會點, 因為太耐無見過自己短髮勒! 剪完嗰時, 我同Queenie講, 我好似返番中學咁呀! 好學生feel呀! 但當佢幫我set完頭, 嗰一刻真係feel倒, 成個人唔同咗呀! 出到街, 見倒鏡都唔認得自己...
 不過我而家最擔心係我唔識搞自己個頭囉! 因為個頭set得好, 會係一個好型嘅頭, 但set得唔好, 我驚會變顛婆, 但如果唔set, 咁個頭就會係一個好普通同好鬼學生嘅髮型........真係好驚呀...........搞唔掂嘅話..........我聽日點返工呀?
 舊嘅我 新嘅我
10月28日 好事陸續有嚟琴晚約咗幾好(三個)舊同學出嚟, 其中兩個之前已經firm咗會喺下年結婚, 一個三月, 另一個五月, 今日再有一個半firm話會下年十月, 一時之間, 我所有嘅舊同學好似約埋一齊同一年結婚咁! 大家好似真係要轉去一個新嘅路, 開始一個新嘅生活................ 但琴日見倒佢哋, 好難想像Li幾個仲好似未長大嘅女仔下年就要做人太太勒!
咁我又喺度祝福佢哋同佢哋嘅愛人永遠幸福快樂啦!
 二人時間
只看你都足夠 任風景退後
跟你眼光緊扣 為怕一段段落遺漏 共你終於一起單獨夢遊 就似我身處的不是地球 為這時候等得太久 擁抱你的感覺 並非不快樂 只怕喪失知覺 是怎麼被幸運尋獲 就似開水之中添下蜜糖 又似眼中滲出一滴汗 幸福純屬願望 變真時不懂去講 似花為你留住 趁這刻盛放 時間 枕於你懷內不經不覺流逝 時間 寫於你門外浪浪蕩蕩都不枉費 讓我 悄悄去關上大門過這一世 讓我知道你共我 渡每一秒都感到珍貴 （叫我相信你共我 無甚麼會代替） 時間 躺於你眉上一起一跌消逝 時間 花於你唇上日日夜夜太多話題 讓我 世界裡只有二人永遠放開身邊一切 讓我感覺著你 讓每一秒鐘都變矜貴 10月27日 今年第一張紅色炸彈今晚同咗一D舊同事食飯, 一張枱五個人, 就只有我仲喺Li間公司度做.........識嘅同事走嘅走, 炒嘅炒, 真係做到好無癮.
其實今日食飯最主要嘅目的, 就係其中一個女仔結婚派貼, Li張貼係我今年第一張收嘅, 接嗰陣都真係有D手震. 但其實都好開心嘅, 因為你見倒派貼嗰個女仔, 佢真係笑得好開心, 我諗結婚嘅人真係有樣睇架, 佢嘅笑容係比平時更加燦爛.
食完飯之後, 因為好飽, 所以決定行去佐敦搭車, 佢話佢沿路有車, 咁我哋就一齊行, 我哋一邊行一邊傾偈, 後來到佢個巴士站, 因為我哋講到停唔倒口, 所以最後佢都好好咁, 陪我行去佐敦, 到咗佐敦之後, 我問佢喺邊度搭車, 佢話佢要去油麻地, 同埋想去永安睇下有無床買. 咁我就決定同佢再行上一個站.
喺我哋行緊嗰時, 我哋傾咗好多野, 佢話俾我知佢同佢男朋友一齊已經十五年! 係呀! 係拍咗拖十五呀! 唔係結咗婚十五年呀! 又一個稀有動物出現喺我眼前.
我好佩服D人, 由十幾歲拍拖拍到結婚都係同一個, 唔係講以前喎, 而係講緊Li個年代喎!
我成日覺得成年人思想成熟D, 或者都有可能會一心一意, 但都有好多都係唔定性, 更何況係一個十幾歲嘅小朋友?! 喺佢哋身邊出現咁多誘惑, 可以專心一意嘅又有幾多呢?
但原來真係有架! 但諗深一層, 我身邊唔係已經有一個呢咩?! 我哋識嗰時, 佢何嘗唔係一個十幾歲嘅"小朋友"?
其實我諗咁多, 會唔會係擔心緊一樣野呢? 其實Li個問題我成日都問自己, 但當我見倒我D舊同學, 加埋Li個舊同事, 我就好似見倒一線曙光咁, 佢哋俾倒我一個信心, Li個世界係有一D咁專一嘅人, 可以由細個拍拖拍到大甚至結婚都係同一個.
而阿爸阿媽亦都俾倒個好好例子我睇, 俾我知道年齡真係唔係問題, 佢哋都可以走倒咁長嘅路, 點解我唔可以?
所以我唔會再care身邊D人點樣講! 就算講到將來有幾灰都好. 我都相信我一定會幸福嘅!
C.W., 多謝你今晚陪我行咁多路呀! n_n 我喺度再次恭喜你! 希望你同你老公一直幸福快樂, 白頭到老....... 10月25日 毫無同情心嘅大嬸我每日返工搭lift, 好多時都會見倒一個大約三十幾歲坐住輪椅嘅男人. 出咗lift後, 如果可以嘅話, 我都會行快兩步, 開定個閘等佢出嚟, 咁當然有時其他人都會嘅! 但大部份人嘅視線好似只會向前, 目空一齊咁開咗門就走咗去, 完全無理過嗰個男人, 佢有時諗住推快D架車, 諗住執人尾喺度門未關前衝出去, 但往往架車都會俾度關咗一大半嘅門kick住咗.......我都唔明D人, 係咪真係咁趕呀? 真係等一等都唔得? ...........今日有個阿嬸仲離譜, 我喺lift度又見倒嗰個男人, 架lift落到地下, 隔離部lift咁啱又一齊開, 個大堂霎時間就多咗好多人, 咁Li個時候, 有個大嬸喺隔離部lift慢慢行出嚟, 我見住佢望倒個男人, 然後佢突然急步行, 我諗係人都覺得佢會係去開定門幫嗰個男人架啦! 係呀! 無錯呀! 佢真係衝去開門呀! 仲要好大力去開門.........然後走咗去, 咁度門俾人大力開, 佢個反彈力咪大囉! 嗰個男人又因為想執人尾, 又搞度架車又係咁樣kick住咗..............大佬呀! 見唔倒就話啫! 見倒都仲要係咁? Li個阿嬸都唔知有無搞錯架! Li D人真係好討厭囉!!!  10月21日 忙...........到透唔倒氣Diamond又上咗大陸勒..........  , 跟住嚟緊嘅兩星期佢都大陸 - 香港 - 大陸咁走..........."忙" - 係一個形容佢嗰時唔可以少嘅一個字!! 佢成日都好忙  , 每次見佢都好攰 , 有時放假都唔知好唔好叫佢喺屋企休息, 但我哋已經一個星期只係見一次同出一次街咋喎.....咁都唔見?! 咁同唔係拍拖有乜分別. 我都知自己有時想佢陪而又陪唔倒我嗰時, 真係忍唔住咁俾D說話佢聽, (有好多時都因為咁而嗌交), 但次次講完之後, 就會諗起佢又真係唔想, 邊個唔想放假? 邊個唔想去玩? 所以而家都希望自己盡量收歛自己D脾氣, 同自己講: 佢陪你都只係因為佢有責任心, 認真工作, 唔似某D人喺公司hea下, 浪費時間, 浪費公司資源上網睇股票, 個腦淨係識得諗住賺快錢, 一D都唔腳踏實地咁嘅男人好  .............唔係! 係好好好(下刪數百個好字)得多..................所以我會儘我所有嘅精神去支持佢, 因為佢忙極都唔會忘記所有重要日子...........  但係................今個月佢真係忙到唔記得咗...............  ..............唔緊要啦! 佢已經應承咗會補送番俾我架..........................希望佢記得啦...........10月20日 Jan Jan's Park 終於開張嘞~~~~講左好耐話要開個blog, 成日都好懶, 的唔起心肝搞, 但琴日去左燒野食, 實在太開心, D相又影得好開心
 ,終於都係唔得, 都係要開個blog同人哋分享下 (唔理人哋覺唔覺或都睇唔睇倒啦! 總之我就係要開.....仲要好有火咁開) ha~~~~~ Anyway, welcome to my Blog~~~~~ n_n
|
|
|
